દક્ષિણ ભારતીય વાનગીઓSouth Indian vegetarian recipes

દક્ષિણ ભારતીય નાસ્તો ગુજરાતમાં રોજિંદો થઈ ગયો છે. ઢોસા, ઈડલી અને ઉપમા ઘણાં ઘરોમાં અઠવાડિયે એક-બે વાર બને જ છે. નીચેની રેસીપી ઘરની રસોઈ માટે છે — ખીરું, આથો અને તવા પરની સમજ સાથે.

આથો એ જ આખી વાત છે

ઈડલી અને ઢોસાની સફળતા મસાલામાં નહીં, આથામાં છે. ચોખા અને અડદની દાળ અલગ અલગ પલાળવાં, અડદની દાળ બારીક અને ચોખા સહેજ બરછટ વાટવા, અને બંને ભેગાં કરી હાથથી ભેળવવાં. શિયાળામાં ગુજરાતમાં આથો ધીમો આવે છે — ખીરું ઓવનમાં લાઇટ ચાલુ રાખીને કે ગરમ જગ્યાએ મૂકવું. ખીરું બમણું થાય અને ઉપર પરપોટા દેખાય એટલે તૈયાર.

એક ખીરામાંથી ત્રણ વાનગી

એક વાર ખીરું બનાવો તો ત્રણ દિવસ ચાલે છે, અને દરેક દિવસે જુદી વાનગી થાય. પહેલા દિવસે ઈડલી — ખીરું તાજું અને ઓછું ખાટું હોય ત્યારે ઈડલી સૌથી પોચી થાય. બીજા દિવસે ઢોસા, કારણ કે થોડું ખાટું ખીરું વધુ કરકરા ઢોસા આપે છે. ત્રીજા દિવસે ઉત્તપમ કે અપ્પે, જેમાં ખટાશ છુપાઈ જાય છે. આ ક્રમ સમજી લો તો વધેલું ખીરું ક્યારેય ફેંકવું નહીં પડે.

સંભાર અને ચટણી વિશે

સંભારમાં ગુજરાતી સ્વાદ પ્રમાણે ઘણાં ઘરોમાં થોડો ગોળ ઉમેરાય છે, અને એમાં કશું ખોટું નથી. આંબલી છેલ્લે ઉમેરવી — વહેલી નાખશો તો શાકભાજી ચડતાં નથી. નાળિયેરની ચટણી બનાવ્યાના દિવસે જ સારી લાગે છે; ફ્રિજમાં બે દિવસમાં ખાટી થઈ જાય છે, એટલે થોડી જ બનાવવી.